ఎవరు తిరిగి తెస్తారు మా ప్రాణాల్ని?

గుండెలు పిండిన నొప్పిని
ముక్కలయిన శరీరం పడిన భాధను
చిద్రమయిన బ్రతుకును
తునాతునకలయున  జీవితాల్ని
కొండగట్టు లోయలో
సమాధి అయిన ఆశల్ని
బ్రతుకుల్ని బుగ్గి చేసిన ఆ క్షణాల్ని
మరచిపోలేక
నా కవిత్వాన్ని కన్నీటితో రాస్తున్నా
 అక్షరాల కోసం వేదనా సంద్రంలో వెతుకుతున్నా
ఆ ఘటన తర్వాత
మేలుకొన్నదా ప్రభుత్వం?
పోయిన ప్రాణాల్ని ఎవరయినా
తిరిగి ఇస్తారా?
చర్విత చరణం గాదని ఏ దేవుడయినా
ఇస్తాడా వాగ్ధానం?
తిరిగి రాని లోకాలకు వెళ్ళిన
జీవాత్మలు పరబ్రహ్మలో అవుతాయా
మమైక్యం?

12.09.2018
వారణాసి భాను మూర్తి
( కొండ గట్టు బస్సు ప్రమాదంలో 60 మంది ప్రాణాలు పోగొట్టుకున్న ఘటనల్ని చదివి ఆవేదనతో రాసిన కవిత)

బస్సు భూతం

బస్సు భూతం
--------------------++++++-----------------
మొక్కులు చెల్లించి
అంజన్నకి మొక్కి రావాలని
కొండ గట్టు ఎక్కిన బీదా సాదలకు
ఎంత కష్టం ? ఎంత కష్టం?

అక్కడ తుక్కు సామాన్లకు
పనికి రాని సర్కారు  బస్సు
పద్దతి ప్రకారం రోజూ కొండ గట్టు చేరవేసేదే!
బ్రేకులు పడని బస్సుకు
నిజంగా డ్రైవరన్న దేముడే!
అంజన్న కోసం
కొడుకులు -  కోడళ్ళు
అన్నలు -  తమ్ముళ్ళు -అక్కలు‌- చెల్లెళ్ళు
అయ్యలు - అమ్మలు
తిరగ బడిన బస్సు  ప్రాణాలు తీసింది
చావుకు దగ్గరలో బస్సు ముక్క లయింది
పోయిన ప్రాణాలు తిరిగొస్తాయా?
పగిలిన  బొమ్మలు అతుక్కొంటాయా??
సర్కారిచ్చే నగదు పరిహారం
ఎన్ని‌ ప్రాణాల్ని తిరిగి తెస్తుంది?
బ్రతుకులు బుగ్గి అయినాక
ఎన్ని సుద్దులు చెప్పితే లాభం ఏమి?
నిన్నటి పచ్చని  బ్రతుకులు
నేడు ఖతం అయినాక
ఎవర్ని అడగాలి?
ఇది ప్రభుత్వ వైఫల్యమా?
ఇది విధి  పెట్టిన శాపమా?
ప్రాణాలు పోగొట్టుకున్న అమాయకులకు
మళ్ళీ ప్రాణం తిరిగొస్తుందా??

( కొండగట్టు లో ఈ రోజు జరిగిన బస్సు ప్రమాదంలో 40 మంది మరణించారని వార్త విన్నప్పుడు ఆవేదనతో రాసిన కవిత)
భాను వారణాసి
11.09.2018.

మనిషి మారేదెలా ?

భాగం VI


మనిషి మారేదెలా ?
-----------------------------------
ఏ పని అయినా కొనసాగడానికి, దేవుని ఆశీర్వాదం ఉండాలి అని కొన్నిసార్లు నేను భావిస్తున్నాను. ఇది జరగాలి అని   ఉంటే, అది జరగవచ్చు. జరగ గూడదు  అని ఉంటే  జరగదు.

విమానాలు, రైళ్లు, బస్సులలో ప్రయాణిస్తున్న చాలా మంది  ప్రయాణీకులు    చాలా సందర్భాలలో, వారు సురక్షితంగా చేరతారు . మరియు కొన్ని సందర్భాల్లో ప్రమాదాలు ఎదుర్కొన్నారు. ఇటీవల, అనుకోకుండా ఒక బస్సులో       కాల్పులు జరిగాయి .  చాలామంది మరణించారు. ప్రజలు తీవ్రవాదుల సమస్యతో భయపడ్డారు. చాలా మంది  తీవ్రవాదుల  చేతుల్లో  మరణించారు . మానస సరోవర్ యాత్ర  ఎంత క్లిష్ట తరమో  మనకు తెలుసు . అయినా వేల  భక్తులు  వెడుతూనే ఉంటారు .  తీవ్రవాద  సమస్య  ఉందని తెలిసినా చిరునవ్వుతో వెడతారు . అయితే వారి ముఖాల్లో అదే  నవ్వు లతో వారు  సురక్షితంగా తిరిగి వచ్చారు.



నాకు  తెలిసిన ఒక వృద్ధ  జంట వారి జీవితం లో  ఏ సమస్య లేకుండా అన్ని సమయాల్లోనూ       తీర్థయాత్రలో    సురక్షితంగా ప్రయాణించే వారు . కానీ హఠాత్తుగా, ఒక తీర్థయాత్రలో, భర్త కుప్పకూలి చనిపోయారు. మరియు   తన దహనం ఆ యాత్రాస్థలంలోనే జరపిన  ఆయన  సతీమణి  తిరిగి వచ్చింది .  చాలామంది ముస్లిం భక్తులు మక్కా వద్ద తమ చివరి మజిలీ లో వెళ్లి కొందరు సంతోషంగా  తిరిగి  వస్తారు.    కొందరు  తమ ముక్తి మార్గాన్ని అక్కడే చేరు కొంటారు . అలాంటి  వారు అది వారికి గొప్ప వరం  అని భావిస్తారు.   హిందూ భక్తులు  అక్షరాలా వారి వృద్ధాప్యాన్ని కాశీ వద్ద చనిపోయేలా గడుపుతారు.



ఇది ఎందుకు జరుగుతుంది? కొంతమంది అకస్మాత్తుగా మరణిస్తున్నారు . మరియు కొంతమంది ప్రజలు వారి  ప్రమాదకర  తీర్థ యాత్రలు  చేసినా తిరిగి  వస్తారు  .   

 కొందరు ధనికులుగా జన్మిస్తారు మరియు కొందరు వారి రోజువారీ ఉనికి కోసం భూమిపై నరకాన్ని చూస్తున్నారు. కొంతమంది ప్రజలు ఎయిర్ కండిషన్డ్ గదులలో మరియు  కొంతమంది గూడు       లేక   , కూడు  లేక  కొందరు  ప్లాటుఫారంల మీద  నిద్రిస్తున్నా రు. అసలు కారణం ఏమిటి? దేవుని దృక్పథంలో, అన్నీ , అందరూ  ఒకేలా ఉన్నప్పుడు, ఈ అసమానతలు ఎందుకు?

అంతేకాక నేను ఒక  పని చేయాలనుకుంటున్నాను, కానీ నేను చేయలేను.  చెయ్యలేను  అని  అనుకొన్న పనిని  అవలీలగా  చేస్తున్నాను .

ఇది ఇప్పుడు జరగకపోవచ్చని నేను అనుకొంటే       అది హఠాత్తుగా జరుగుతుంది. "మనిషి ప్రతిపాదించాడు మరియు దేవుడు నిశ్చయించుకుంటాడు" అనే మాట నిజంగా తన స్వంత కర్మలతో ముడిపడి ఉంటుంది. నేను ఒక భూమిని కొనుగోలు చేయాలనుకుంటున్నాను మరియు నేను ఆ సమయంలో చేయలేను. కానీ హఠాత్తుగా నేను తరువాత తేదీలో మంచి ఇంటిని కొనుగోలు చేయవచ్చు. ఎందుకు జరిగింది? నేను ఏదైనా కావాలనుకుంటే, నేను పొందలేను మరియు నాకు ఏదో కాకుంటే నేను దాన్ని పొందవచ్చు. ఇది విధిగా పిలవబడిందా?

అందుకే  ఇక సినిమా కవి  ఇలా అన్నారు .

'' అనుకున్నామని జరగవు అన్నీ
అనుకోలేదని  ఆగవు అన్నీ
జరిగేవన్నీ  మంచికనీ
అనుకొవడమే  మనిషి  పని ''



హిందూ తత్వశాస్త్రం చెప్తుంది వారి పూర్వపు    జన్మల కర్మ ప్రకారం    ఈ  జన్మలో    అన్ని కర్మలు. తన గత జీవితంలో మంచి పనులను చేసి ఉంటే, అతను ఈ జన్మలో మంచి జీవితాన్ని ఆనందిస్తాడు. నేను  ఈ విషయంలో ఇంకా స్పష్టంగా లేను .   ఈ నమ్మకం ఎందుకంటే, మనం  గత జీవితం మరియు పునర్జన్మ మీద నమ్మకం ఉండాలి. గత జీవితం  నమ్మితే, మనకు  పునర్జన్మలో నమ్మకం ఉండాలి.



కొంత  మంది   కృషి చేసినప్పటికీ  వారు  ఉనికి కోసం    పోరాడుతున్నారు     . కొందరు వ్యక్తులు చాలా కష్టపడి పని చేస్తూ  మిలియన్లను సంపాదిస్తారు.

కొందరు వ్యక్తులు అవినీతి, మాఫియా, భూ కబ్జాలు , డబ్బు  దొంగిలించడం, చంపడం, దోపిడీ, మానవ  ట్రాఫికింగ్ ,  ఆడబిడ్డల  మాన భంగాలు , హత్యలు ,  నల్ల  వ్యాపారం మరియు మోసం చేయడం వంటివి  చేసి  అక్రమ మార్గాల ద్వారా లక్షలాది రూపాయల్ని  సంపాదిస్తున్నారు. ఇలాంటి  వారు         దేవుని  మీద  భక్తి , భయాలను కలిగి ఉంటారు.  గుడులు , గోపురాలు  తిరుగుతారు.  విరివిగా  దాన ధర్మాలు చేస్తారు.   కానీ  అలాంటి చట్టవిరుద్ధమైన కార్యకలాపాలను చేయకుండా  ఉండ     లేరు . అక్రమ మార్గాల ద్వారా సంపాదించిన కొందరు వ్యక్తులు తమ పాపాలను విమోచించడానికి ధార్మిక ప్రయోజనాలపై వారి ఆదాయాన్ని ఇస్తారు. తిరుమల వద్ద అనేకమంది తెలియని భక్తులు   లక్షలాది రూపాయలు మరియు బంగారు దేవుడికి సమర్పిస్తారు  .  ఈ ప్రజలు చట్టవిరుద్ధమైన కార్యకలాపాలు ద్వారా సంపాదించిన వారి డబ్బును అందించడం ద్వారా కూడా దేవుణ్ణి  అపవిత్రం        చేస్తున్నారని నాకు సందేహం ఉంది.



మనుష్యులు ఏమి చేయాలని, చేయకూడదని మన  పురాణాలు , ఉపనిషత్తులు       స్పష్టంగా తెలియజేస్తున్నాయి. మానవుడు సమాజంలో కొన్ని నైతికత మరియు ప్రవర్తన నియమాన్ని అనుసరించాలి. కానీ ప్రస్తుత తరానికి విలువలు లేవు మరియు వారి ప్రధాన లక్ష్యం ఏమిటంటే డబ్బు సంపాదించడం మరియు జీవితాన్ని ఆస్వాదించడం ,  ఆనందించడం. ఈ పరిస్థితులలో, ఇలాంటి  ప్రజలు దేవుని ఆశీస్సులు పొందగలరా ?



కొంత మంది ప్రజలు పేదరికం, అశాంతి, నిరాశ, నిరుపయోగమైన వర్షాలు, కరువు, ప్రమాదాలు ,  త్రాగునీటి కొరత ,  వరదలు, మంటలు, భూకంపాలు మరియు మతపరమైన హత్యలు  అనేవి దేవుని కోపం యొక్క ఫలితం  అని అంటారు .

మానవుడు దేవునితో ఉన్న సంబంధాన్ని అభివృద్ధి చేయలేడు  అని కొందరి అభిప్రాయం . ఎందుకంటే ఈ సంక్షోభం నుండి దేవుడు వారిని ఎలా రక్షించగలడు అనే మీమాంశ . దేవుడ్ని  నిజంగా మానవులు నమ్మరు. తన సొంత పిల్లలు ఇటు వంటి బాధ పడుతూ ఉంటే, ఎందుకు దేవుడు మరొక పునర్జన్మ తీసుకోవడం   లేదు ?      మరియు ఈ విశ్వంలో మానవత్వం ను  ఎందుకు కాపాడలేక  పోతున్నాడు ?  దానవత్వం  ఎందుకు  బలంగా ఉన్నది ?



నేటి ప్రపంచంలో రోజు ధ్వంసరచన  అనేది క్రమంగా ఉన్నది . కాలుష్యంతో అందమైన స్వభావం చనిపోతుంది. సైన్స్ మరియు టెక్నాలజీ సంపద మరియు సౌకర్యాలను సృష్టిస్తున్నాయి, కానీ అదే సమయంలో ప్రజల ఆరోగ్యంతో  కాలుష్యం ఆడుకొంటున్నది . కొన్ని దేశాల ప్రజలు  సరైన ఆహారం మరియు మందులు లేకుండా మరణిస్తున్నారు .  కొన్ని దేశాల ప్రజలు  సరైన  మానవ సంబంధాలు లేక   మానసిక సమస్యలు ఎదుర్కొంటున్నారు . అణు యుద్ధం బెదిరింపుతో  అగ్ర రాజ్యాలు  బడుగు రాజ్యాల్ని  నాశనం  చేస్తున్నాయి. బయో కెమికల్ శాస్త్రం నూతన తరం  మానవులకు  జీవం పోస్తూ,   ప్రకృతి  సృష్టి ని భయపెట్టేటట్లు బెదిరిస్తుంది. ప్రాంతీయ అధికారాలు మరియు మతం ఆధిపత్యాన్ని సంపాదించేందుకు కొన్ని  దేశాలు పోరాడుతున్నాయి.



సమయం గడుస్తున్నది . సంవత్సరాలు  చరిత్రలో  కలుస్తున్నవి . దేవుడు మరియు మానవుల మధ్య సంబంధాలు పురోగమించవు .మానవ మరియు దేవునికి మధ్య బలమైన బంధం లేదు. దేవుడి  మీద  వివాదాస్పద ఘర్షణలతో మరియు విభిన్న అభిప్రాయాలతో   కునారిల్లుతున్న ఈ మానవజాతిని ఎలా కాపాడుకోవాలో కూడా  దేవుడికి  తెలియడం లేదు .

 ప్రకృతి కూడా కొన్ని  సమయాల్లో ఉగ్ర తాపాన్ని దాల్చి , మానవ జాతిని  పరీక్షిస్తుంది .  ప్రకృతి నశించిపోవచ్చు లేదా మనం చేసే  వికృత  పనుల  వల్ల  ప్రకృతి  మనుగడ సాధించకపోవచ్చు. ప్రకృతి పరీక్షంచ బడినట్లుగా దేవుడు  గూడా పరీక్షంచ బడ్డాడు . అందువల్ల అది దేవుని పనితనాన్ని  పరీక్షించి    మరింత పునఃనిర్వాహకులను  తీసుకువస్తుంది . మరియు మానవులు మరియు మానవ జీవితం యొక్క ఆలోచనను చైతన్యవంతం చేస్తుంది. అది మరొక్క   సత్య యుగానికి  ఆరంభ మవుతుంది.



జై గణేశ


కాపీ రైట్స్ :ఆథర్

Pl see  my english original article in      '  https://wavesofexpression.com '

మట్టి వేదం

    మట్టి వేదం
-----------------++++--------------

తొలకరి జల్లులు కురిసిన వేళ
మట్టి సుగంధాన్ని దోసిళ్ళతో ఒడిసి పడుతూ
వ్రాసుకొంటున్న మట్టి కవిత్వం నాది.

మడిలో కదం తొక్కుతూ
మట్టిని తొక్కిన పాదం
వరి పంటకు దుక్కి పెడుతూ
బురద పూలు  పూచిన పాదం
ఆ మట్టి  రైతన్న పాదాలకు
అభివందనం  చేస్తూ
వ్రాస్తున్న మట్టి  గేయం నాది

వెండి కడియాలు తొడిగిన కాళ్ళు
ఇంద్ర ధనస్సు లా వంగిన నడుము
నాటు మడిలో పదం పాడుతూ
వరి గాట్లు పెడుతున్న అమ్మలక్కల
పాదాలకు నమస్కరిస్తూ
పాడు కుంటున్న మట్టి పదం నాది

అడుసు తొక్కిన కుమ్మరి కాళ్ళకు
మట్టి కుండలు  పూచిన పారిజాతాలు
మట్టితో బొమ్మల్ని చేస్తున్న
అపర బ్రహ్మన్నలకు అభివాదం చేస్తూ
ఆలపిస్తున్న మట్టి గీతం నాది

మట్టితో సహ జీవనం చేస్తూ
మట్టి వాసన వేస్తున్న శ్రమ జీవుల
సౌందర్యాన్ని వర్ణిస్తున్న మట్టి పాట నాది

శనగ గుత్తుల వేరుకు అంటుకొన్న
ఎర్ర మట్టి సాక్షిగా
చెరకు గడలకు  పేరుకొన్న
నల్ల రేగడి మట్టి సాక్షిగా
నా మట్టి కవిత్వానికి
మట్టి రేణువులే బీజాక్షరాలు

మట్టిలో  పుట్టి
మట్టిలో పెరిగి
మట్టిలో కలిసి పోవడమే
మట్టికి  మనిషికి మధ్య
కాలం  గీసిన చిత్రాలు, విచిత్రాలు

నా మట్టి  వేదాన్ని అంకిత మివ్వడానికి
సాదా సీదా  మనుషుల  కోసం నేను  వెతకడం లేదు
మట్టినే విబూధిలా పూసుకొనే మట్టి శివుళ్ళను
వెతుకు తున్నా!
మట్టి కోసం తపస్సు చేసే మట్టి మునుల్ని
వెతుకు తున్నా!
మట్టిని నమ్ముకొని మట్టిలో బంగారాన్ని
పండించే మట్టి రైతన్నల కోసం
వెతుకు తున్నా!

28.04.2018

కృతజ్ఞతాభివందనములు

కృతజ్ఞతాభివందనములు

తెలుగు భాష పట్ల మమ కారం , అభిరుచి మెండుగా ఉండడం వలన పదవ తరగతి నుండి పత్రికలు , వాటిలో వచ్చే కవితలు, కథలు చదవడం అలవాటయింది . మనసులోని భావాలు పెల్లుబికి కవిత రూపంలోనో , కథ రూపంలోనో వచ్చేది . '' poetry is the spontaneous overflow of powerful feelings . it takes the origin from emotions recollected in tranquility '' - william words worth గారన్నట్లు బయట కనబడే వస్తు వైవిధ్యం నాలో ఉన్న కవిని ప్రేరేపించే ఉత్ప్రేరకాలు అయ్యేవి . అట్టడుగు ప్రజల జీవన దుర్భరాన్ని చూసి కలత చెందే వాడిని . పిడికెడు మెతుకుల కోసం ఎంగిలి ఆకులు ఏరుకొనే బాధా సర్ప ద్రష్టల జీవన వెతలు నాలో అంతః సంఘర్షణకు దారి తీసేది . దాదాపు 500 కవితలు, 40 దాకా కథలు రాసాను . తొలి కవితా సంపుటి ' సాగర మథనం ' 2000 లో , మలి కవితా సంపుటి ' సముద్ర ఘోష ' 2005 లో ప్రచురించి పాఠక లోకానికి దగ్గరయి, కీ శే డాక్టర్ సినారె ,కీ శే డాక్టర్ అక్కినేని , డాక్టర్ ఎన్ గోపి , , డాక్టర్ ఎం కె రాము , శ్రీ కళా కృష్ణ , శ్రీమతి అత్తలూరి విజయ లక్ష్మి గార్ల ప్రశంసలు పొందినాను . ఇప్పుడు నా మూడవ కవితా సంపుటి ' మట్టి వేదం ' పాఠక మహాశయుల ముందు ఉంచుతున్నాను. ఆశీర్వదించి , ఆదరిస్తారని నా మనవి.
ప్రముఖ కవి , సీనియర్ జర్నలిస్టు శ్రీ  కెరె జగదీష్ గారు నా ఈ కవితా సంకలనానికి తమ చక్కని విశ్లేషణతో ముందు మాట రాసి ఇచ్చినందుకు నా కృతజ్ఞతాభి వందనములు సమర్పించుకొంటున్నాను. ఆయన విశ్లేషణతో ఈ పుస్తకం ఒక్క గొప్ప గుర్తింపు పొందినదని చెప్పక తప్పదు. కెరె జగదీష్ గారు కవి ప్రపంచానికి సుపరిచితులు. ఆయన అంధుల జీవితాల మీద రాసిన దీర్ఘ కావ్యం   ' రాత్రి సూర్యుడు ' అనేక భాషల్లో అనువాదం చెయ్యబడి అనేక మంది ప్రశంసలు అందుకుంది. అలాగే తను రాసిన '  సముద్ర మంత గాయం'  రెండు భాషల్లో అనువదించబడి ఒక గొప్ప జాతీయ కవిగా నిలబెట్టాయి. ఇటివల ప్రచురించిన  ' రాతి నిశ్శబ్దం ' గూడా ఈ మధ్య కాలంలో వచ్చిన గొప్ప కవితా సంపుటి .  ముందుమాటతో నా కవితా సంపుటి ' మట్టి వేదం ' ను సుసంపన్నం చేసినందుకు మరో సారి అభివందనాలు తెలుపు కొంటున్నాను.

వాట్సప్ ద్వారా ఎంతోమంది కవులను ప్రోత్సహిస్తూ , నిర్విరామంగా కృషి చేస్తూ , తెలుగు వైభవం ' అనే సంస్థను స్థాపించి , సహస్ర కవి మిత్ర , సహస్ర కవి ప్రపూర్ణ అనే బిరుదల్ని ఇచ్చి , కవి సమ్మేళనాల్ని నిర్వహిస్తూ , కవి లోకాన్ని వెన్నంటి ఉండి నడిపిస్తున్న సాహితీ ప్రియులు శ్రీ మేక రవీంద్ర గారి ఆధ్వర్యంలో ఈ నా 'మట్టి వేదం ' ని ప్రచురణకు నోచు కోవడం నా అదృష్టంగా భావిస్తున్నాను . ఈ సందర్బంగా మేక రవీంద్ర గారికి నా హృదయ పూర్వక అభినందనలు తెలుపు తున్నాను .

నాకు జన్మ నిచ్చిన శ్రీ వారణాసి కృష్ణ మూర్తి రావు గారికి, కీ శే శ్రీమతి వారణాసి స్వర్ణాంబ గారికి నా నమస్సుమాంజలి ఘటిస్తున్నాను .

ఈ కవితా సంపుటిని వెలుగు లోనికి తెచ్చిన ఎంతోమంది సహృదయలకు , మీడియా మిత్రులకు నా ధన్య వాదములు తెలుపుకొంటున్నాను.

భవదీయుడు

వారణాసి భానుమూర్తి రావు

18 .06 .2018

హైదరాబాదు

భానుమూర్తి గారి భావ ప్రకంపనలు

భానుమూర్తి గారి భావ ప్రకంపనలు

''that thinking or speaking about  society is also at another level thinking and speaking about life.'' - ruth padel

కవిత్వం అంటే వినోదం కాదు . వేడుక అంతకన్నా కాదు . ప్రాణ భూతమైన ఒక చర్య , సామాజిక బాధ్యత . ఆధునిక కవిత్వానికి నూట ఇరవయ్యేళ్ల చరిత్ర ( 1899 -2018 ) పూర్తి కావస్తున్నది . అనేక సామాజిక ఉద్యమాలకు , భావ జాలాలకు ఈ చరిత్ర కవిత్వరూపంగా నిలుస్తున్నది. తెలుగు కవులు నిర్వహిస్తున్న సామాజిక బాధ్యతకు ఈ చరిత్ర సాక్షి . అలాంటి బాధ్యతాయుత పాత్ర నిర్వహణలో కవులు అత్యంత జాగ్రత్తగా , పరిశీలనా దృక్పథం కలిగి ఉండి , ఎప్పటికప్పుడు స్పందిస్తూ , తన చుట్టూ సమాజం లోని బాధితులు,అభాగ్యులు,దుఃఖిత పీడితుల పక్షాన నిలబడాల్సిన తమ వంతు బాధ్యతను చిత్తశుద్ధితో నిర్వహించాల్సి ఉంటుంది .

కాలంతో పాటు ప్రయాణిస్తారు కొందరు. కొత్త భావాలను సంతరించుకొని , చిగురులెత్తే కొత్త స్వరాలతో , ఆ స్వరాల్లోని సృజనాత్మకత అభినివేశంతో ఉద్దీపులవుతారు . వారు వయస్సుతో నిమిత్తం లేకుండా , స్పందన , ప్రతిస్పందనలతో తమ రచనలను కొన సాగిస్తారు .వారు వ్యక్తీకరించే మాటలను సూటిగా , పదునుగా చెప్పాలన్న ధోరణిని ఎవరైనా స్వాగతించాల్సిందే !. ఈ మధ్య కాలంలో విసురుగా , దుడుకుగా , నిజాన్ని నిక్కచ్చిగా చేప్పే స్వరాలు నేటి సాహిత్య రంగంలో వినిపిస్తున్నాయి. తాము చెప్పాలనుకొన్న పద్ధతిలో అంటే ఘాటుగా చెప్పాలన్న పట్టుదల కొందరి రచనలో స్పష్టంగా కనిపిస్తుంది . అందులో తప్పు లేదనిపిస్తుంది . తమలోని రచనా శక్తిని తాకట్టు పెట్టి లొంగి పొయ్యే వాళ్ళు అప్పుడూ వున్నారు . ఇప్పుడూ వున్నారు . ఎప్పుడూ ఉంటారు .

''కసితో స్వార్థం శిరస్సును గండ్ర గొడ్డలితో నరక గల్గిన వాడే నేటి హీరో'' అన్న శివసాగర్ మాటకి ఇప్పటికి ప్రాసంగికత ఉంది. కులం, మతం, పెట్టుబడి మనుషుల మీద చేసే పెత్తనాన్ని ఆధిపత్యాన్ని ప్రశ్నించిందాల్సిందే అన్న సత్యాన్ని కవులు గమనించి తమ రచనలలో నిగ్గదీసే వాక్యాల్ని కనబరచడమే నిజమైన జీవన చైతన్యానికి దాఖలాగా నిలిచిపోతుంది.

'' there is genuine suffering in the world, the suffering of actual people , and poetry addresses this suffering almost better than anything else. we are not passive but active subjects of both personal and society history. it demands our attention , our intervention. memory is a responsibility'' - edward hirsch.

పట్టభద్రులై వివిధ కార్పొరేట్ కంపెనీలలో చీఫ్ జనరల్ మేనేజర్ బాధ్యతలను నిర్వహించి , వారణాసి భానుమూర్తి రావు గారు , తమ చిన్నతనంలో తల్లి తండ్రులు ఎదుర్కొన్న కష్టాల్ని , కన్నీటి సంఘటనల్ని నేటికీ గుర్తు చేసుకొంటూ , సామాజిక బాధ్యతల్ని గుర్తెరిగి , రచనల పట్ల ఆసక్తి పెంచుకొన్నారు .సమాజంలోని ద్వంద వైఖరి మారాలని , కులమత సంఘాలు కనుమరుగై పోవాలని , అలాగే స్వార్థ రాజకీయాలు కూడా ఉండరాదని గట్టిగా నమ్మిన వ్యక్తిగా తమ ఆలోచనల్ని కవిత్వాలుగా, రచనలుగా మార్చుకొని సాహిత్య రంగంలో ప్రవేశించారు. కవిగా , రచయితగా కవితలు, కథానికలు రాస్తూ గొప్ప సాహిత్య సేవ చేస్తున్నారు. 2000 సంవత్సరంలో ' సాగర మథనం ' తొలి కవితా సంపుటితో సాహిత్య రంగ ప్రవేశం చేసి పలువురి ప్రశంసలు పొందినారు . మలి కవితా సంపుటి ' సముద్ర ఘోష' 2005 లో ప్రచురించి సాహిత్య రంగంలో తమ కంటూ ఒక ప్రత్యేకతను సాధించారు. ఇదిగో , ఇప్పుడు తమ మూడవ కవిత కవితా సంకలనాన్ని ' మట్టి వేదం ' పేరిట పాఠక లోకానికి పరిచయం చేస్తున్నారు.

ఇందులో దాదాపు 40 కవితలు సామాజిక బాధ్యతతో రాసినవే !

వ్యవసాయ రంగంలో రైతుల కన్నీటి వ్యధల్ని గమనించిన భానుమూర్తి గారు తమ 'మట్టివేదం ' కవితలో

''మడిలో కదం తొక్కుతూ

మట్టిని తొక్కిన పాదం

వరి పంటకు దుక్కి పెడుతూ

బురద పూలు పూచిన పాదం

ఆ మట్టి రైతన్న పాదాలకు

అభివాదం చేస్తూ

రాస్తున్న మట్టి గేయ నాది ''

అంటూ రైతన్నల మీద తనకున్న ప్రేమను , అభిమానాన్ని , గౌరవాన్ని తెలపడం అభినందనీయం . అలాగే

'' నా మట్టి వేదాన్ని అంకిత మివ్వడానికి

సాదా సీదా మనుషుల కోసం నేను వెతకడం లేదు

మట్టినే విభూదిలా పూసుకొనే మట్టి శివుళ్ళను వెతుకుతున్నా

మట్టికోసం తపస్సు చేసే మట్టి మునుల్ని వెతుకుతున్నా

మట్టిని నమ్ముకొని మట్టిలో బంగారాన్ని

పండించే మట్టి రైతన్నల కోసం వెతుకుతున్నా !''

అంటూ కవితను ముగించడం చాలా బాగుంది . అంటే మట్టినే నమ్ముకొని , మట్టి కోసం పరితపించి , ఆ మట్టి లోనే బంగారు పంటల్ని పండించే రైతుల కోసం తానూ గాలిస్తున్నానని చెప్పడంలో రైతాంగం పట్ల ఆయనకున్న ఆసక్తి కనబడుతోంది.

ఎంతటి కవి అయినా తాను బాల్యంలో తిరుగాడిన పల్లె వాతావరణాన్ని , తీపి గుర్తుల్ని , అక్కడి ఆత్మీయతల్ని మరువ లేడు .అలాంటి అనుభవాల్నే భానుమూర్తి గారు ' నా పల్లె ప్రపంచం ' కవితలో తెలుపుతూ

'' గడ్డి పువ్వునై మంచు బిందువుల్ని పలక రించాలని వుంది

గన్నేరు పువ్వునై గాలికి వూగాలని ఉంది ''

అంటూ ఎంతో అందంగా చెపుతూ ఈ కాంక్రీటు నగరాల్లో

'' సాయంత్రం చెట్టు మీద చేరే కాకుల శబ్ధం

ఇళ్లకు చేరే పశువులు చేసే కోలాహలం

గోవులు రేపే గోధూళి వాసన ఇక ఎవరిస్తారు ? ''

అని వాపోతారు. అంతటి అందమైన పల్లె ప్రపంచానికి దూరమై నగరాల్లో మర మనుషులుగా బతుకుతున్న మానవ జీవితాన్ని ప్రతిబింబించే అంశాలతో ఈ కవిత చక్కగా సాగింది.

నేటి వ్యవస్థలో పెచ్చి పెరిగి పోయిన హింస , దిక్కు తెలియని కుటుంబ వ్యవస్థ , అనాధల , అభాగ్యుల కన్నీటి కథలకు అద్ధం పెట్టే కవితగా ' విషం కురిసిన రాత్రి ' ముగింపులో

'' అస్తవ్యస్తమైన వ్యవస్థ బాగుపడే వరకు

ప్రతి రాత్రి విషం కురుస్తూనే ఉంటుంది ''

అని తన అసహాయతను , ఆవేదనను వ్యక్తం చేశారు .

' నాన్న' అనే కవితలో

'' నాన్నల త్యాగాలు వృధా కావు

చిన్న మొక్కలై , వృక్షాలై ఫలాల్ని అందిస్తాయి '' అనడం చాలా బాగుంది.

కన్న పేగు బంధం దూరమై , ఆ తల్లి తండ్రులు అనుభవించే వ్యధా భరిత కథల్ని మనం నిత్యం చూస్తూనే ఉంటాము. వృద్ధులైన తల్లి తండ్రులు కన్న బిడ్డల కోసం అహర్నిశలు కలవరించడం లాంటి దృశ్యాలు మన సమాజంలో కనిపిస్తూనే ఉంటాయి. అలాంటి సంఘటనకు సంబంధించి బిడ్డకు దూరమైన ఒక కన్నతల్లి పడే ఆవేదనని ' బిడ్డా నిన్ను సూసి ' అనే కవితలో

'' ఎక్కడున్నా నీవు - సల్లగుంటే సాలు

కొలువు లోన నువ్వు - మంచి గుంటే మే

లు

ఒక్క సారి వచ్చి - పలకరించు కొడుకో

బిడ్డా నిన్ను సూసి - పాన మొదులు తాను ''

అనడంతో కళ్ళు చెమరిస్తాయి . వాస్తవాలు మన కళ్ళ ముందు కనిపిస్తాయి .

తల్లిని స్మరించకుండా ఏ కవీ తన కవితా సంపుటిని పూర్తి చేయలేడన్నది నగ్న సత్యం . ప్రతి కవీ తన తల్లితో అనురాగ అనుబంధాల్ని , ప్రేమ బంధాల్ని దూరం చేసుకొని ఉండలేడు . అలాంటి పరిస్థితుల్లోనే కవిగారు తన ' అమ్మా నన్ను క్షమిస్తావా ? అనే కవితలో

'' నా కోసం ఉపవాసాలు చేశావు

నా కోసం జాగరణలు చేశావు

గానీ నీకోసం మేము ఏమీ చేయలేదని చింతిస్తున్నా ! ''

అంటూ

''ఇంకొక జన్మ అంటూ ఉంటే

నువ్వు నా కూతురిగా పుట్టు తల్లీ

నీ ఋణం నేను తీర్చుకొంటానమ్మా !''

అని చెప్పడం ఎంతో హృద్యంగా ఉంది .

'' రండి మేధావుల్లారా

అందరం కలిసి కొత్త దేశాన్ని నిర్మిద్దాం

మట్టి వాసన మనుషుల్లో నింపడానికి ''

అంటూ ' మేధావుల్లారా ' అనే కవితలో పిలుపు నివ్వడం బాగుంది .

ఈ కవితలో అస్తవ్యస్తమైన దేశ పరిస్థితుల్ని కవిత్వికరించడం సుగమంగా సాగింది . బ్రష్టు పట్టిపోతున్న దేశంలో కుళ్ళన వ్యవస్థను మార్చలేమని వ్యధ చెందడంలో భానుమూర్తి గారు సఫలీకృతులయ్యారు. అలాగే 'మిత్రమా ' , నేను రోజూ ఏడుస్తున్నాను ' , ' పోనీ పొతే పోనీ ' , ' అసలు నువ్వెవరు ' , ' మా గుడిసె ' , ' పుష్పించిన మనిషి ' లాంటి కవితలు ఆకట్టు కొంటాయి.

సమాజాన్ని నిశితంగా పరిశీలించిన భానుమూర్తి గారు , సమాజం లోని పలు అంశాలను కవితా వస్తువులుగా తీసుకొని కవిత్వికరించడానికి తన శాయశక్తులా కృషి చేశారు.

ఒక కవి సాధన క్రమంలో వస్తువు - లోలోతుల్లోకి పోయి అంతర్గత నివృత్తిలో నీటి పిట్టలా పైకి తేలుతాడు . కవి అనుభవించిన దంతా మనం అనుభవించలేక పోవచ్చు . కానీ మనదయిన నిర్మాణం జరగ డానికి , ఆ కవి - ఆ కవిత ఉపయోగ పడతాయి . ఒక వస్తువు మీద కవిత ఎత్తుకంటే ఆ వస్తువు విశ్లేషణ ఒక conclusion కి drive చేసే దిశగా సాగుతుంది .

సమాజం పట్ల , కవిత్వం పట్ల ఏంతో ఆసక్తి , శ్రద్ధ కనబరుస్తున్న భానుమూర్తి గారు జీవితానికున్న అన్ని కోణాలను అధ్యయనం చెయ్యడంలో మరింత ముందడుగు వేస్తూ , కవితా నిర్మాణంలోని మెళుకువలను , ఎత్తుగడలను , శిల్పం , అభివ్యక్తి లాంటి విషయాల పట్ల సంపూర్ణమైన పరిశీలనలను చేస్తూ మరిన్ని ఉత్తమ కవితలతో ఈ సాహిత్య రంగంలో ముందడుగు వేస్తారని ఆశిస్తూ , అద్భుతమైన ' మట్టి వేదం ' శీర్షికతో వెలుగు లోకి తెచ్చిన భానుమూర్తి గారికి హృదయ పూర్వక అభినందనలు తెలుపు తున్నాను.

తేదీ : 15 .06 . 2018

కెరె జగదీష్

కవి , సీనియర్ జర్నలిస్టు

రాయదుర్గం

అనంతపురం జిల్లా , ఆ .ప్ర

పునరపి జననం

పునరపి జననం

~~~~~ ~~~~~~~~~~

ఇక మనం  అణు బాంబులా విచ్చన్నమై పోవాల్సిందే!

ఇక మనం సునామీలా విరుచుకు పడాల్సిందే!

సింహంలా జూలు విదిల్చి  పులిలా గాండ్రించాల్సిందే!

కొవ్వెక్కిన మృగాళ్ళ అరాచకాలకు బలి అయిన అబలలు 

రాక్షస సంహారం చెయ్యాల్సిందే!

అభం శుభం తెలియని పసి పిల్లల్ని 

చిదిమేస్తున్న నర హంతకుల భరతం పట్టాల్సిందే!

నవ మాసాలు మోసి పెంచిన తల్లిని 

క్రిందకు తోసిన కిరాతకుడి చేతులు కాళ్ళు తెగ్గొట్టాల్సిందే!

ఆఫీసుల్లో  అమ్మాయిల్ని  కామ కేళీ వస్తువులుగా వాడుకొంటున్న

 మర్యాద మదన కామ రాజుల్ని  ఇరగ దీయాల్సిందే!

మత మార్పిడికి పచ్చని కాపురాల్లో చిచ్చు పెడుతున్న

 మత పిశాచులకు సిలువ వెయ్యాల్సిందే!

వివాహ బంధాన్ని అపహాస్యం చేస్తూ వావి వరుసలు మరచి

 చెలరేగే గార్దభాల్ని  నట్టేట ముంచాల్సిందే!

 ప్రజ్వరిల్లిన ప్రచండ భయంకర అక్షరాలు కత్తులై 

చుర కత్తులై నరాధముల కుత్తుకలు కత్తరించాల్సిందే!

ఎదురేగుతున్నాను నేను సముద్రాల దిగంతాలకు 

 ఎగజిమ్ముతున్న లావాల పర్వతాల శిఖరాలకు

నన్ను నేను ఆహుతి చేసుకొని బూడిదగా తిరిగి 

ఈ మట్టిలో మళ్ళీ వాలుతాను

అప్పుడయినా ప్రక్షాళన చేసుకొన్న సమాజాన్ని చూడడానికి ఒక చెట్టుగా పుడతాను.

వారణాసి భానుమూర్తి

06.01.2018