మేధావుల్లారా !

మేధావుల్లారా !



ఈ  దేశంలో  మేధావులంతా
నోరు విప్పని  నాడు 
వానపాము గూడా  విషసర్పమై  కాటేస్తుంది

మేధావులంతా  గబ్బిలాల్లా
తలక్రిందులై  తపస్సు చేస్తున్నంత  వరకూ
వితండ వాదమే  మహా వేదమై పోతుంది

మేధావుల్లారా
రండర్రా  రోడ్ల మీదకు

ద్వంద నీతులు  కొందరు  పలుకుతున్నా
నోరు మెదపని  సజ్జనుల్లారా
రండర్రా  దండోరా  వేయడానికి

న్యాయ దేవత కళ్ళల్లో  కన్నీళ్ళు
భరత  మాత  ఒంటి నిండా  రక్తపు  మరకలు
మూడు హత్యలు , ఆరు  మాన భంగాలు
కుల మతాలు కట్టుకొన్న  కుళ్ళు ఆన కట్టలు
ఎవడికి వాడే  రాజ్యాంగాన్ని  రచిస్తున్నారు
ఎవడికి వాడే  చట్టాల్ని నిర్వచిస్తున్నారు
వేదాలకు  అవేదాలు
అవేదాలకు వేదాలు వల్లిస్తున్నారు
దేశం  బ్రష్టు పట్టిపోతోంది
ఈ దేశంలో  మట్టి  కల్మషం
గాలి కల్మషం , నీరు  కల్మషం
మనసులు  కల్మషం , మనుషులు  కల్మషం

ఒప్పుకోండి  మేధావుల్లారా
ఓడి  పోయ్యామని .....
కుళ్ళిన  వ్యవస్థను  మార్చలేమని  !


పాము కుబుసం  వదలినట్లు
కొత్త  చర్మాన్ని  తగిలించు కొని రండి
మీ కళ్ళల్లోని  రేటినాలు  మార్చి చూడండి
బానిస  మనస్త్వత్వం  నుండి బయట పడండి


మీ భయాన్ని , అసమర్థతను
మీ బ్లేజేర్ కిందనో  , రేబాన్  గ్లాసుల  వెనకనో
దాచేసి  తప్పుని ఒప్పుగా , ఒప్పుని తప్పుగా చెప్పకండి!

రండి  మేధావుల్లారా !
అందరం కలిసి  కొత్త దేశాన్ని నిర్మిద్దాం
మట్టి వాసన  మనుషుల్లో నింపడానికి...



“The fundamental cause of the trouble is that in the modern world the stupid are cocksure while the intelligent are full of doubt.”
― Bertrand Russell