ఎంత కష్టం ? ఎంత కష్టం ??

ఎంత  కష్టం ? ఎంత  కష్టం ??

----------------------------------------------

దారి దాపున   చెత్త కుప్పల
చిత్తు  చిరుగుల  నేరు కుంటూ
చిట్టి కొడుకును  చంక  మోసి
అలిసి  పోయే  మాతృ మూర్తికి 
ఎంత కష్టం ? ఎంత  కష్టం ??

చిరిగిపొయి  మాసిపోయిన
చీరకొంగును  బొడ్డు దోపి
పాలు  గారే చిట్టి బిడ్డను
బొంత  మీద  పండ  బెట్టి
మట్టి  రాళ్ళను  మోసుకెళ్ళే మాతృ మూర్తికి
ఎంత కష్టం ? ఎంత  కష్టం ??


నెత్తి మీదను  మోపు  బెట్టి
కాలి నడకను  ఊర్లు  తిరిగి
చంక  జొలెన  బిడ్డ  నొదలక
కడుపు  కూటికి చీపుర్లనమ్మే మాతృ మూర్తికి
ఎంత కష్టం ? ఎంత  కష్టం ??

పందులున్నా కుక్కలున్నా
దోమలున్నా  ఈగలున్నా
పలుగు పరకతో  రొచ్చు  తీసి
పాయి ఖానాలను  శుభ్రం  చేసే  మాతృ మూర్తికి
ఎంత కష్టం ? ఎంత  కష్టం ??

మంచు లోనా   ,ఎండ  లోనా
రాత్రి  అయినా , పగలు  అయినా
పిల్ల పాపల నొదలి   పెనిమిటిని  వదలి
చీపురెట్టి  నగర  రోడ్లను  శుభ్రం  చేసే  మాతృ మూర్తికి
ఎంత కష్టం ? ఎంత  కష్టం ??


భూమి  తల్లిని  నమ్ము కోని
ఎండ  గాని వాన  గానీ
దుక్కి దున్ని  నాట్లు  వేసి 
కలుపు  తీసి  కండె  జూసి పంట  కోసి
ఎండ బెట్టి  ఎండి  బొయ్యే  రైతు  తల్లికి
ఎంత కష్టం ? ఎంత  కష్టం ??


 పచ్చ రవిక  తొడిగి  తెల్ల చీర  కట్టి
 మల్లెపూలు  సిగన  ముడిచి ముస్తాబు చేసి
పసి  వాడని పసిడి  తల్లిని  మాతమ్మను  చేసి
ఆచారం  పేరిట  అంగడి బొమ్మయిన  ఆ  చిన్న   తల్లికి
ఎంత కష్టం ? ఎంత  కష్టం ??

ఆడపిల్ల  కెవ్వు  మంటే వడ్ల  గింజను  నోట దోసి
పురిటి  పసికందు  ప్రాణాలు  తీసే తల్లిదండ్రుల దాష్టికానికి
బలి  అయిన అన్నెం పున్నెం  ఎరుగని  ఆడ పిల్ల కు
ఎంత కష్టం ? ఎంత  కష్టం ??

05. 01. 2005
భాను వారణాసి