ఇంకెప్పుడు ?

ఇంకెప్పుడు ?
---------------------------------------------

ఇంకెప్పుడు
మందార మకరంద మధుపమ్ములను   గ్రోలేది
ఇంకెప్పుడు
సందిట  తాయతులు సరిమువ్వ గజ్జెలు అని పాడుకొనేది
ఇంకెప్పుడు
బ్రతుకు  జిల్లేడాకుల వనంలో  తులసి  మొక్కల్ని పెంచేది
ఇంకెప్పుడు
లంకా దహనం గావించుకొని  అజ్ఞాత వాసం గడిపేది
ఇంకెప్పుడు
చీమల దండు బారి నుండి తప్పించుకొని  తపస్సు చేసేది
ఇంకెప్పుడు
ముఖాన  ప్రశ్నిస్తున్న ముడతలకు   సమాధానం చెప్పేది

ఆత్మ వర్చస్సు  కృష్ణ పక్షం ఎక్కిన  వేళ
రోజు  రోజూ  ఒక ప్రశ్నార్థకమే !

ఇంకో సంయానము   కోసం   వెతుకులాటలో ఉన్న సమయాన
నిన్ను నువ్వే ప్రశ్నించుకో'... ఇంకెప్పుడు అని

అవశేషంగా బ్రతుకు మారిన వేళ
శస్త్ర  చికిత్సలో  నొప్పినేగా  మిగుల్చుతాయి  ఈ  ప్రశ్నలు

రహస్య పేటికల్లో  దాగి ఉన్న
సృష్టి  రహస్యం  మన కర్థం గాదు

అందని  ఆకాశంతొ  నయినా
మాటలు కలిపి చూడాలి !


భాను వారణాసి
31. 01. 2015