అకల్మష మానవత

అకల్మష  మానవత
-----------------------------------------------


మడి కట్టిన సనాతన సంప్రదాయాలు
మనల్ని ముందుకు నడిపించవు మిత్రమా!
కులాల గోతిలొ
మతాల నూతిలో
నిన్ను నువ్వే స్వయం సమాధి చేసుకొంటున్నావు
నీ కులపోడి తెగులు
నీ మతమోడి జాడ్యం
మనుషుల మధ్య
మనసు ద్వారాల్ని మూసి వేస్తున్నాయి
ఎక్కడ చూసినా అంతహ్ సమీకరణాలే
నువ్వు విప్పిన బూతుల పంచాంగం వినలేక
జాలి గుండెలు కొన్ని వాన పురుగులై పొయ్యాయి
పర జాతి సమస్తము
మన జాతి కాదనుకొన్నప్పుడు
మన కేమున్నది గర్వ కారణము?
నా కొద్దీ కులము
నా కొద్దీ మతము
నా కొద్దీ ప్రాంతీయ భాషా విద్వేషాలు
నా కొద్దీ దేశాల మధ్య యుద్ధాలు
నా కొద్దీ  కరెన్సీ ల మధ్య ఆధిపత్యాలు
నా కొద్దీ కుల మత  వైషమ్యాలు
నా కొద్దీ జాతుల పోరాటాలు
నా కావలసింది నీ చల్లని స్పర్శ
పులకరింతల పలకరింత
అకల్మష మానవత!
23.12.2014