దృష్టి కోణం

వారణాసి భానుమూర్తి రావు
శీర్షిక : దృష్టి కోణం 
-----------------------------------------


నువ్వు చూస్తున్న  ఈ ప్రపంచం 
నిత్యం  సత్య మయం

నేను చూస్తున్న ఈ ప్రపంచం
నిత్యం అసత్య మయం

నువ్వు చూస్తున్న ఈ ప్రపంచం
మధుర మనోజ్న  మంజుల  సీమ

నేను చూస్తున్న ఈ ప్రపంచం
బాధా సర్ప ద్రష్తుల నిప్పుల కుంపటి

ఈ‌‌ ప్రపంచం  ఒక పుస్తకం
అక్కడి నుండి సువర్ణాక్షరాలు రాలి పడి
సాహిత్య పుష్పాలు విరిసాయి

ఈ ప్రపంచం ఒక  పర్వతం
అక్కడి నుండి ఎర్రని లావా ఎగిసి పడి
విప్లవ సూర్యుడ్లు వెలిగారు

ఆకాశం పురివిప్పిన 
నెమలిలా ఉంది

ఆకాశం రక్తం 
పులుముకొన్న రాక్షసిలా ఉంది

చంద్రుడు తెల్లని వెన్నెలను తాగి
నక్షత్రాలతో సరసాలుతున్నాడు

చంద్రుడు ఎర్రని రక్తాన్ని
అకాశం నిండా ఒంపుతున్నాడు.

మనిషి ఒక దేవుడే!
చూసే దృష్టి కోణాన్ని‌ బట్టే 
మంచీ చెడూ !! 
------------------------------------------------------------