మూడు పొద్దులూ !

మూడు పొద్దులూ / bhanu varanasi

మూడు పొద్దులూ నాకు సమానమే
ఉదయం , అపరాహ్నం మరియు సాయంత్రం
సమాంతరంగా సూర్యుని ఎదలో
పడుకున్నప్పుడు
ముప్పొద్దులూ నాకు సమానమే
ఉదయ భానుడు అందించిన
చిరు చిరు కాంతులు
పాదరసంలా జారి పోతున్నప్పుడు
దిక్కు తెలియని మందార పూవులా నేను
పాలి పోతున్నాను
అపరాహ్నం వేళ
'చేతి వెన్న ముద్ద' లా ఉన్న సూర్య గోళాన్ని
గళంలో వేసుకున్నప్పుడు
నీలకంఠుడు నేనే అనుకొని
మురిసి పొయ్యాను నేను
సాయంకాలపు వేళ
సముద్ర తీరంలో ఏకాకినై
సంచరిస్తున్నపుడు
ఓ పెద్ద అగ్ని గోళం
పసుపు నీళ్లతో చిలకరించుకొని
స్నానం చేస్తున్నట్లు అనిపిస్తోంది నాకు
రంగు రంగుల మేఘాల పరివృత్తంలో
ఆకాశం నీలి రంగు ముసుగు వేసుకొని
చిక్కని చీకట్ల కౌగిలి లోకి
ఇమిడి పోతోంది !

(This poem was written on 20.09.1996  . Just got that piece of paper in the old files  and like to post here.)